高人

可以俾高人指點，究竟係好事定壞事? 我應該去省靚自己張 resume, 定係 build 好自己條 team?

Mizuno Wave Idaten 3

以前覺得 Nike 太俗氣，見 NB 唔錯，同埋有黑色，所以經常買 NB 跑鞋。但教練話 Mizuno 先得專出跑鞋，心裏不禁有疑惑，但一拎上手，嘩! 雖然外型同一般跑鞋無異，但絶對係輕。所以馬拉松戰鞋，終於入手!

Can someone help?

廣州有大批民工滯留，捱住寒風冷雨，又俾附近商店搶劫，可以幫幫忙嗎?

MyBoss MyHero

好耐未睇過長瀬智也嘅日劇，對上一次好似係無線嘅《巨星夫婿 2003》。呢一齣略嫌長瀬智也表情誇張去凸出黑社會嘅型象，就好似江華响《楚漢驕雄》入面演項羽大嗌一樣，不過無損好睇程度。鐘意睇《極度鮮師》嘅，都會對呢一齣有好感，只不過，今次做黑社會嘅對象變成學生。

都係校園劇嘅情節，一樣由 唔受同學歡迎 > 被接受 > 秘密揭穿 > 畢唔到業，再响中間穿插長輩嘅支持同社團兄弟嘅協助。驚喜欠奉，但校園劇勝都係題材輕鬆，唔係好使用腦，耐不耐睇一齣，都幾舒服。回想之前睇過嘅，其實拍一套唔好睇嘅校園劇，都幾難。

跑鞋

對腳太大，好難買鞋... Nike, Addidas, New Balance 好多，但 Mizuno 無...

Not in a Particular Good Position

Portfolio 跟隨港股大上大落，波幅幾近一樣。都係以不變應萬變，賬面損失不算甚麼，一日唔套現，係唔會知鹿死誰手。

遠在天邊

一年前，post 過一個關於幼稚園同學嘅文章，噚晚終於得到回應。
除咗小學買餸時碰過一兩次面，都真係廿幾年無聯絡。原來，大家都响上環工作，今日出嚟食咗個 lunch, 雖然好耐無見，但大家都有一種莫名嘅歡喜。廿幾年嚟無講嘅嘢，今日都講咗唔少，交換近況後，友情再度出發。

理想達到

如無意外，今年會被其中一間雜誌或報章等媒體訪問。

BizTalk Bootcamp

星期一，同 Microsoft 攪咗個 Bootcamp, 一個省招牌嘅動作:
1. Microsoft Hong Kong 响 BizTalk 嚟講第一次攪 Bootcamp
2. 公司第一次同 Microsoft 攪 Bootcamp
3. 我第一次同街外人做 seminar

壓力超大，但係都叫做過得去，行動成功。但係之後我先知，我識嘅 Microsoft 人都差唔多知道我做呢壇嘢，萬一失敗，亦係三輸嘅局面。

錢錢錢錢

當知道自己嘅基本薪金已經到頂，就會有所覺悟。一年前，我已經覺悟咗，亦都知公司嘅 cash flow 情況。我响兩個月前做咗一件全世界都會話我傻嘅事。我同我上司講咗大慨咁嘅意思嘅說話:「唔好加我太多人工，我本事嘅，自然會搵响你設定係制度下搵到。」

半年前嘅呢個制度，就係想能者多勞 + 多勞多得。如果，响呢個制度下仲諗住座响度加人工，心態依然係一個普通嘅員工，而唔係公司嘅伙伴。老生常談，一個人係資產定負債，唔係咁難分辨。

Boys Love

好似大約一年前，睇咗一套 Boys Love 嘅戲，感覺都接受到，劇情拍得 OK. 見到有出咗睇二集，諗住一看無妨，點知，睇咗頭嗰十分鐘左右，已經睇唔到落去。

人大咗，可能都保守咗，同埋將男仔之間嘅「交往」完全合理化，始終接受唔到，劇情亦唔似第一集咁描述愛，而係嫉妒同偏見，將男生「女性化」，睇落都幾難頂。只可以話，演員好出色，演得出女性响呢方面嘅神緒，但我亦唔會想睇呢種戲劇。金枝慾孽、火舞黃沙、溏心風暴，全部零接觸。

正常生活

Project 一個一個完結，終於可以唔駛留响公司留到咁夜。

偵探伽利略

好耐無睇過日劇，呢一齣，正!

第一次 - 公開演講

聽日，就係第一次對街外人講 Talk. 壓力好大，希望無意外!

氣管炎

一次傷風，又開始不停地咳，今次搵咗個專科睇，話係氣管炎，有收縮嘅情況。診金都要差唔多成千蚊，好貴，但希望可以治得到，起碼星期一唔好出事先。

shaneng.net 第一擊 - 相薄

6GB 幾嘅相，終於 upload 晒，但 video 係一個頭痛嘅題目...
http://gallery.shaneng.net/

休憩空間

响新聞度聽到政府官員响立法會講休「恬」空間，惡夢... 正字人去咗邊?

比香港更先進

如果香港肯跟部份大陸政策，就真係天佑香港。

小學聚會

好耐無見過一班小學同學，好明顯，我係局外人，因為佢哋聚嘅次數都幾密。有好多人都變晒樣，肥變瘦、瘦變肥，但性格不變，豪爽嘅繼續豪，文靜嘅繼續靜。

有朋自遠方來，不亦樂乎? 感覺好舒服!

歐型傷風

臨離開希臘嗰陣中招，返到嚟香港病發...

2007 回顧

排名不分先後:
- 開始著唔同嘅衫去成為一個 manager
- 公司搬 Office
- 公司制度改變，加薪之餘亦加辛，亦要開始睇錢
- 公司開始成為 Microsoft partner, 是福不是禍，是禍檔不過?
- 為馬拉松做好準備
- 做 gym 而整傷眼
- 總投資回報約 32% (股票: 35%, 基金: 32%, MPF: 22%), MPF 真係幾差吓... 希望轉咗宏利後可以好 D
- 第一次睇棟篤笑
- 第一次旅行
- 第一次去哈囉喂
- 第一次做負離子
- 買咗好多 gadgets
- 考咗車牌
- 飲咗好多餐
- 買咗 shaneng.net