Online Game 淺談

大家都知 Online Game 係點玩，但係又知唔知點解咁吸引呢? 收月費嘅，個個都知點賺錢，但係 D 免費嘅 Online Game 又係點賺錢呢?

以小弟玩緊嘅「熱血江湖」為例，又要 set 一堆 server, 又要不斷咁加 feature, 又要唔收錢。你會唔會肯投資? 今次先講吸引力，下次再講賺錢方法。

其實 Online Game 不外乎打怪獸、練功、升級、解任務。隻隻 Online Game 都係咁，玩與唔玩，就要睇幾樣因素:

1. 宣傳、口碑 - 第一當然要俾人知道先
   
2. 入場費 - 當然通常都係好平，吸引玩家
   
3. Server 質素 - Server 如果好 Lag, 就聽執都得
4. 人物畫功 - Q版、大人版，可愛、恐佈任君選

呢幾樣就差不多決定有幾多人入場玩。好喇，跟住就要取決於隻 Game 嘅控制有幾復雜，即係如果攪到好似 Doom 咁幾百個制，又攪到頭暈眼花，真係幾難留得住人長玩。

• 一開始，打怪獸最緊要易打，俾咗滿足感人，升級又快嘅，咁玩家自然有快感啦！
• 跟住一班人又可以組隊打怪獸，交朋結友嘅因素，已經係一個好大嘅誘因(例如叫埋自己好友一齊玩，又或者同另外一半一齊玩)。其實，如果計經驗值度計得好，可以令人感覺升級升得快 D, 咁咪可以今到呢班人定時定候練功。
• 到解任務，獎品同獎金唔少得，任務同任務之同嘅關係 set 得好，令到唔解任務唔得，咁當解任務後，又有滿足感俾玩家。
• 升到某一級時，可以開新門派，做掌門，呢個就無得頂。
• 當然，賺錢係每隻 Online Game 都唔少得嘅項目，開舖頭係一個好大嘅誘因。

總括嚟講，一隻 Online Game 可以吸引到唔同嘅人:

1. 升級
2. 交友 - 我見過有人不斷將寶物送俾人去建立友誼
   
3. 賺錢

呢 D 都係可以帶俾玩家嘅滿足感，當加入埋競爭原素，咁可能有玩家見到另外一個人嘅攻防皆強，就自然想急起直追。而商機，就係响呢度出現。

雙羸

話說我舊同事間公司要做一個 system 去 keep track 一 D vendor 報嘅價。本來係要搵 freelance 做，我就無時間，推咗。但係就醒起可以俾公司做，就叫個 IT Manager 直接聯絡我。

咁上咗去佢哋公司了解完個 requirement, 我哋又報咗個價俾佢後，間公司又 OK 喎！依家我公司又有生意做，我又可以分到佣。有時獨食，真係難肥，但係退一步，係可以做到雙羸嘅！

ICQ

小弟有個怪癖，就係得閒時去睇人哋 ICQ 嘅 Info. 我覺得 ICQ 嘅 Info 係一個表達自己嘅地方，係人都睇得，但係你又唔知有無人睇。人哋睇完，可能笑一笑，就行開咗，又唔會去追究你寫過乜。所以，我自己寫嘅嘢，好多都係內心嘅 說話，又唔想同人講，但求有個知音人睇完，問候吓，就已經心滿意足。

生意

故名思義，生意就係求生嘅意志。蝕本生意，好明顯唔係生意。所謂創業難，守業更難。諗到一個 idea, 再實行埋，但係唔知賺唔賺到錢，又係咪一盤生意呢?

如果投資唔大，又唔係靠佢開飯，無乜風險，的確可以一試。唔係嘅話，最好都要做好市場調查，睇吓有無咁嘅需求好 D 喇！

理財

好多朋友都無好好咁理財，亦都無打算去做任何財務計劃。其實，好多事都同錢有關，結婚、生仔、供樓、退休等等。唔通真係等要用嗰陣先諗?

又或者可能有少少計劃，但係不得其法，例如放晒入銀行，又或者倚賴保險。到最後，達唔到任何目標，得個煩字。係咪都應該題醒吓朋友點做一個好嘅財務計劃呢?

星座

筆者係一個相信星座嘅人，雖然未致於素有研究，但亦略懂一二。點解會信呢? 睇返自己同身邊嘅人，都同星座所講嘅性格非常吻哈。

就好似娘親咁，係非常主觀、發嬲時唔係人咁笨嘅獅子座。而其中一個好友呢，就係做事好積極、有時有少少衝動嘅白羊座。而自己，就係比較內向、用外殼保護自己嘅巨蟹座。我諗星座所講嘅嘢都有七、八成準，點都叫做有參考價值。

但唔講唔知，巨蟹座同白羊座其實唔係咁啱，但係我同呢位朋友就非常要好。呢 D 就係之前所講嘅「緣」。

憎

憎，一個可圈可點嘅字，每人嘅定義都唔同。唔鐘意可以叫憎，討厭亦都可以叫憎。但係乜嘢定義都好，都係負面嘅。但係，我哋又需唔需要去憎一個人呢?

如果一個乞你憎嘅人，係朝見口晚見面，你憎佢，就好似罰自己咁。一個你唔識嘅人得罪咗你，你憎佢，你又唔會記住，憎嚟都無謂。

與其去憎一個人，不如正面一 D 去發掘一個人嘅好處。多了解，體諒，對自己又好，話唔埋隨時多個朋友。但如果你真係好憎一個人，亦都搵唔佢丁點好處，咁就唯有避之則吉。

嗌交

剛剛睇完套日劇，指兄弟姐妹之間嗌交係平常事，獨生嘅呢，就無乜機會同人嗌交。嗌交，正面嚟講，係兩個人毫不忌諱咁表達自己嘅諗法，語氣比平常重。但係，點解會同人嗌交呢? 有乜人會同你嗌交呢?

一個同你嗌交嘅人，同你熟係好重要。同你唔熟，可能你連嗌都費事。你可以為一個人著想而同佢嗌，可以為芝麻綠豆嘅分歧同佢嗌，甚至為嗌而嗌。嗌完一場交，當日可能有 D 唔舒服，但係第二日，又可以玩到攪埋一堆。

以前，啊哥未去英國之前，兄弟間係經常嗌交，甚至打交。到啊哥去咗英國，就同朋友嗌。讀完大學之後，返到嚟香港，就收晒火喇。可能好珍惜依家嘅朋友，唔想傷和氣，所以唔想嗌。

朋友 - 緣

呢幾日諗緊一個難題，話說有個朋友，中學識嘅。我無同佢同過班，剩係同佢一齊讀過一個星期先有兩堂嘅 Computer Studies, 但係就偏偏係依家最老死嘅朋友。

我今日都問過佢，但係佢都解唔到究竟我哋點樣熟絡。我諗唯一解釋到嘅，就係緣。緣呢樣嘢好奇妙，只要時辰一到，擋都擋唔住。無嘅話，真係住响隔離，甚至做埋同房，都唔會識到。

我呢，人緣就幾好喇，但姻緣就嘛嘛。