星念

Saturday, June 30, 2007

夏、雨

夏天，係落雨嘅季節。閒來一個狂風雷暴，雖然讓人有一個措手不及，之後嘅涼快係舒服嘅~
比起一個大太陽，對於怕熱嘅我，都係鐘意落雨多 D.

永遠懷念家駒

唔經唔覺，十四年喇! 點都好，多謝你嘅歌!
聽電台跟住唱，先發現你好多歌已經刻响腦海，每一拍都仲跟得幾好。

一個要好嘅朋友睇到我之前篇資產與負債後寫咗篇文為 in-house programmer 申寃，雖然我之前篇文重點唔係要講 in-house vs. software house. 但既然有反應，我又當然回應吓，本來想寫個 comment, 但越寫越長，不如就嚟一個交換日記~~

當睇返 cashflow 嘅時候，IT 部門向內流入嘅錢永遠都係內部「調入」，向外流出嘅又大部份係人工開支。到最後，cost center model 就只不過係一大條水喉由非 IT 部門駁咗去 IT 部門嘅人工到，漏出嚟嘅 profit 用嚟支付燈油火蠟等基本開支。

問題一: Profit 唔會大，否則即係 overcharged, 儲備亦都唔會多。
問題二: 當市道差，各大賺錢嘅部門都唔會願意去俾錢 IT 做 development, IT 嘅需求自然下降，相關部門亦係最先出現虧損，但因儲備唔多，除非可以加價，否則亦好快要請人離開。

一個 department 係 asset 定 liability 其實跟本唔重要，對個人而言，所有事情就只有响環境差時先會見到真章，人才就永遠都係 asset, 我唔相信一個有料嘅人會係第一個被人炒嗰個 (HR 或上司發神經、公司改變營運方針而成個 department close 咗另計). Cost center model 令到前線嘅賺錢部門唔會隨便要求 IT 去做 support, 說穿了就係要減省 IT 開支，到最後都係睇 hard cash 做人。

當年做第一份工又夠係所謂嘅 cost center model, 到話要 cut cost 嗰陣咪又係成個 department 無咗... 除此之外，呢個模式基本上 alienate 晒所有 departments, 賺錢賺得強嘅分拆子公司又得，留返响度做靚公司盤數又得，但洗錢嘅隨時一句唔該好似 PCCW 咁 spin-off 咗個 department 做 outsource vendor 咁就死得。

祈待著回應 :)

Friday, June 29, 2007

唔係路

約人都唔識約就唔好約，唔好遷就嗰 D 定好時間地點活動之後又呢又路又唔出主意嘅人，最煩就係呢 D 人!

母語教學

中大教育心理學系主任侯傑泰﹕必須接納的代價 2007年6月29日

【明報專訊】「實施母語教學是為改善其他科目的成績，並非改善英語，英文科成績比以前差，是社會必須接納的代價。」

改善其他科目嘅成績，又試問出嚟做事咁耐，又有幾多個用得著其他科目嘅知識? 莫講話化學、生物、物理，連數學嘅 completing the square 我都唔記得啦! 犧牲言語呢個代價又未免太大... 可以還原返英語教學嗎?!

他期望學校和學生適應母語教學的學習模式後，英語成績可從後趕上，追上母語教學前的水平。

跟本從小學就係用母語，跟本無需要適應呢個問題。亦即係話英文差，會變成香港嘅死症!

Clocky in Action

同事買咗個好 Fancy 嘅玩意，一個響嗰陣曉得週圍行嘅鬧鐘。

Thursday, June 28, 2007

生命何價?

前排交保費，睇返張保單，原來我家陣條命值二百萬。

見工

原來一個人有幾大 potential, 真係一開口講幾句就知。唔怪得 first impression 咁重要。

Wednesday, June 27, 2007

一額汗...

經過火中取粟一役，5 號仔急轉直下，弱得好緊要。睇吓遲 D 又有無機會再玩多舖考吓眼光先。

Tuesday, June 26, 2007

Development 的意義

土地發展 - Land development
軟件開發 - Software development

一字兩義响翻譯係好普遍嘅情況，但「土地開發」同「軟件發展」又講唔講得通? 發展同開發嘅詞義又有乜唔同?

Onelook 嘅結果:

act of improving by expanding or enlarging or refining
the act of making some area of land or water more profitable or productive or useful

邊個係發展，邊個係開發?

馬路報新聞

企响繁忙嘅灣仔軒尼詩道報新聞，無遮無擋，仲要背住行車方向，雖然雙白線同電車路之間理論上係絕對安全，但真係少 D 膽色都唔得!

燒雞可樂

食完隻燒雞，再飲返罐可樂，好肥，但係好滿足~

資產與負債

一樣係 programmer, 一個做 in-house development, 一個做 software house. 做 in-house 嘅係屬於洗錢嘅 department, cashflow 向外流，亦即係 liability. 做 software house 嘅係屬於幫公司賺錢嗰班，cashflow 向內流，亦即係 asset.

同一條問題，究竟保險係 asset 定 liability? 每個月要洗一筆錢，但係有乜東瓜豆腐又會衍生出另一筆錢。

咁健康呢? 差嗰陣會係 liability, 好嗰陣會係 asset?

响唔同時間、地點、情況下睇同一件事，都會有不同嘅結論。就好似，一個「愛國」嘅人，响當今香港政治下會係 asset 定係 liability?